Dia Mundial di Awa na Boneiru
Dia 22 di mart ta Dia Mundial di Awa. Un dia ku Nashonnan Uni a proklama i ku e ana aki ta hiba e tema: Awa i Desaroyo Duradero. Kiko esaki ta nifika pa Boneiru?
Kralendijk--E ana aki e `Rioleringsproject Bonaire' na Playa ta keda kla. Lo tin mas ku 850 kas i negoshi konekta riba e sistema di kloaka. Tur e awa sushi ku nos ta kolekta, ta keda prosesa dor di e kompania di awa i elektrisidat (WEB) den e instalashonnan pa purifika awa di kloaka. E awa
sushi purifika nos ta usa komo awa pa irigashon pa hardinnan di hotel i den agrikultura i hortikultura. Un bunita resultado ku nos por ta orguyoso di dje. Pero si bo djis pensa ku Boneiru tin ocho bes mas tantu kas i negoshi i ku e kantidat aki ta krese, e ora ei ta klaro ku tin ainda bastante
trabou pa hasi.
Siguiente paso
No ta tur kas i kompania por ta konekta riba e kloaka; esei lo ta muchu kostoso. Un bon alternativa ta un tanki septiko (ku no ta lek) ku tempu truknan di tanki ta pasa kue e awa sushi hib'e pa prosesa den e instalashon pa purifika awa sushi. Mas tantu e kasnan bieu tin berput ainda. E awa
sushi di e berputnan ei ta bai den tera i den e awa di suela. Un siguiente paso logiko lo por ta pues di kambia e berputnan pa tanki septiko.
Pakiko nos tin di hasi tantu esfuerso asina i hasi gastu? Esei ta pasobra nos ke yega na un desaroyo duradero. Si nos no bai ku kuidou ku nos awa sushi, e por kousa kontaminashon den e suela i e awa den suela. E kontaminashon ei por bai den laman, kaminda e refnan di koral ta keda afekta i e
kantidat di piska ta baha. E kresementu di alga i bakterianan danino den e awa salu ta oumenta. Esaki por tin konsekuensia atrobe ku turismo ta bai atras i huntu ku'e nos ekonomia. Tambe awa sushi ta kontene mikrobionan ku ta danoso pa nos salu. Pa preveni tur e konsekuensianan negativo ei,
nos tin di perkura pa tuma medidanan ku ta laga e interesnan sosial, ekonomiko i ekologiko keda den balanse. Un Boneiru limpi pa nos i nos yunan!
Resiklahe
Sinembargo, awa sushi tambe ta materia prima. E por sirbi komo awa pa irigashon ku ta duna tambe nutriente pa e matanan i e suela. E lodo di e awa sushi por uza pa drecha e suela. E aplikashonnan ei ta depende si di un proseso di purifikashon ku ta funshona bon. Pa kuminsa, e awa sushi no
mester kontene supstanshanan robes. Pone e tepnan for di e foyeto : "Paga tinu kiko bo ta spula" den praktika. E foyeto ta optenibel na WEB i na e ofisina di proyekto pa kloaka. E awa purifika mester kumpli ku reglanan stringente ku regularmente ta keda kontrola. Esakinan ta reglanan di e
Organisashon Mundial di Salu (WHO). Tur kaminda na mundu ta resikla awa sushi. Den hopi pais ta usa e awa resikla komo awa di irigashon pa agrikultura riba algun desena di mion hektar di tereno.
Di e manera aki nos ta traha bon ku e awa na Boneiru. Nos ta saka awa di bebe for di awa salu, usa e awa na kas i na trabou, spul'e, rekohe e awa sushi, transport'e, purifik'e i finalmente resikla e awa. Awa limpi pa awe i manan!