"INVESTIGASHON OBESIDAT BOU DI HOBENNAN 2015 BONEIRU"
Kralendijk--E departamentu di Salubridat Publiko (GGD) di direktorado Komunidat i Kuido di Entidat Publiko Bonaire ta organisa kuminsando for di 25 di mart 2015 te ku kuminsamentu di yueni 2015 un investigashon insular tokante obesidat bou di hubentut di Boneiru. E prome skol ku ta bishita ta
Kolegio Kristu Bon Wardador. A hasi e preparashonnan lunanan delanta i awor t'asina leu. E "investigashon obesidat bou di hubentut 2015 Boneiru" ta un investigashon tokante sobrepeso i obesidat serka muchanan di 4 te ku 16 ana. Den e investigashon aki ta traha huntu ku e gran mayoria di e
skolnan di ensenansa primario, SGB i organisashonnan ku ta enbolbi ku e estilo di bida salu di hubentut. E investigashon ta un ripitishon di un paresido investigashon hasi na 2008. E ta funshona alabes komo punto di salida pa e programa JOGG (Jongeren Op Gezond Gewicht). E programa aki tin
komo ophetivo mantene hobennan di Boneiru salu i den bon kondishon promoviendo kome salu i move sufisiente.
Kordinashon di e investigashon ta serka departamentu di Salubridat Publiko (GGD) den koperashon ku Vrije Universiteit van Amsterdam- Medical center (VUmc). Dos studiante di medisina huntu ku sosten di personanan lokal ta hasi e investigashon na e skolnan. Durante e investigashon ta midi
largura, peso i e barika di e muchanan. Den sierto kaso ta midi e preshon di sanger tambe. Alabes ta hasi un enkuesta tokante e patronchi di komementu i moveshon serka hobennan di 10 te ku 16 ana.
Sobrepeso ta forma un menasa pa nos hubentut. Sobrepeso na edat avansa por kondusi na problemanan di salu. Ku e resultadonan di e investigashon aki e departamentu di Salubridat Publiko por desaroya un miho maneho pa konhuntamente ku tur suidadano di Bonaire preveni sobrepeso na un edat yon.
Nos ke gradisi den tur sinseridat tur skol, Sentro pa Hubentut i Famia, INDEBON, i spesialmente tur mayor i muchanan ku ta sinti nan mes enbolbi ku e investigashon i ku a duna nan koperashon.
Ban Biba Salu!