TRABOUNAN DI INFRASTRUKTURA TA TUMA LUGA KU PREVIO PLANIFIKASHON
Kralendijk--Kontrali na e ponensia di mal planifikashon di trabou di e Rotonde nobo na final di Kaya Nikiboko Zuit. E Direktorado di Ruimtelijk en Ontwikkeling Afdeling Beleid en Projekten, ke informa komunidat tur trabounan di infrastruktura ta tuma luga ku planifikashonnan previo huntu ku
tur e departamentunan i servisionan di utilidat tantu pa rapides komo un bon produkto na final.
Den e trabounan di planifikashon ta envolvi tur e servisionan di utilidat i e servisionan kompetente di gobiernu pa sigura un proseso responsabel i aseptabel pa ku e inkonbeniensianan den trafiko. Mester tene kuenta ku basta puntonan di mantenshon den e planifikashon i alabes den realisashon
di e trabou di Infrastruktura. Esaki no ta simplemente bashamentu di asfalt den anochi.
Den e kasonan aktual nos ta atendiendo entre otro kayanan i krusadanan ku tin alrededor di 40 ana bieu ku na e momentunan aki mester disena i konstrui kompletamente di nobo pa kumpli ku e eksigenshanan nobo di trafiko.
Ta kuminsa for di fundeshi te na e ultimo kapa di asfalt. Den e trayektoria di trabou servisio di utilidat di awa, koriente, televishon i telefon kaminda ta nesesario ta probecha una bes ku area ta sera pa trafiko i fundeshi kompletu ta afo pa di nan parti hasi nan renovashon of instalashonnan
nobo den e karetera i krusada. Tur esakinan mester sosode den kordinashon ku otro ku e poko medionan ku ta dispone di dje. Nos ta agradesido na sekshon di polis departamentu di trafiko huntu ku departamentunan di gobiernu durante ehekushon di trabou a duna konseho nesesario pa un miho
resultado.
Publiko ta na altura di esaki pero ta bon pa duna e informashon riba e partikularidat aki pa esunan ku ainda no ta na altura i kisas no tin e pasenshi nesesario ainda pa e gran kambionan ku Bonaire ta tumando luga na e infrastruktura pa un miho trafiko. Ta bon pa remarka ku ainda no tabatin
apertura ofisial di e Rotonde manera a keda anunsia den e artikulo ku a keda publika den korant Extra. Tabata nesesario pa un sirkulashon responsabel di trafiko pa habri e parti di e rotonde aki pa por sigui traha riba e otro partinan di e proyekto.
E proyekto ta konsisti tambe di konekshon di e rotonde riba e otro partinan di nos kamindanan. Den e korant ta notifika ku a tuma kontakto ku e kompania ku ta traha pa mas informashon. Ta rekomendabel pa den futuro preferibel pa aserka esnan responsabel pa e proyekto mes ku ta Direktorado di
R&O di gobiernu di Boneiru.
Ta pa e motibu aki Direktorado di R&O ta sugeri ku si tin pregunta, sugerensha of reklamo, por tuma kontakto ku Direktorado di R&O libremente na Kaya Amsterdam telefon 7178130 i manera ta e kaso ku otro instansianan ku ta aserka nos, lo nos por duna e splikashonnan i alabes por tuma e
sugerenshanan na konsiderashon. Huntu nos por hasi muchu mas pa nos komunidat ku nos tur ta desea ku lo bai den un desaroyo positivo i duradero.