GOBIERNU DI BONEIRU: `GABINETE NO TA KUMPLI KU PALABRASHON'


Den Haag/Kralendijk - Gobiernu di Boneiru mester a konstata asombrosamente ku
Reino no ta kumpli ku palabrashonnan hasi anteriormente. ,,Awe mainta nos a tende di sekretario-general Richard van Zwol di ministerio di Asuntunan Interno i Relashonnan den Reino i di inspektor-general Jenny Thunnissen di ministerio di Infrastruktura i Medio Ambiente, ku gabinete lo no paga e
retrasonan relashona ku infrastruktura, manera e kareteranan malu na Boneiru. Den Haag no ta kumpli ku palabrashonnan hasi ku ta registra den e akuerdo di gobernashon 2010, ku ta netamente firma pa Henk Kamp ku awor ta minister di Asuntunaan Ekonomiko den e gabinete aki", segun diputado
Abraham.

Abase di e akuerdo ei a basa e altura di e pago liber, e asina yama `vrije uitkering'. Reino lo atende i elimina e retrasonan. Pues awor nos mester hasi tur kos ku sigur muchu tiki rekurso. Pa e motibu ei tambe nos desaroyo ekonomiko no ta kuminsa kana, loke ta nesesario pa nos kombati pobresa
na nos isla strukturalmente i pone e provishonnan na un nivel ku ta kuadra denter di Hulanda.

,,Ta realmente inkreibel ku kada bes ta mustra nos ariba ku nos mester kumpli ku palabrashonnan i good governance, pero ku gabinete etol no ta tuma palabrashonnan asina fundamental na pechu. No mas ku resientemente BZK a laga traha un raport i a manda esaki tambe pa Tweede Kamer. For di e
raport a resulta ku Boneiru porlomenos anualmente mester a hana sinku mion doler mas di Reino, pa nos por ehekuta nos responsabilidatnan di un manera drechi", segun diputado Abraham.

,,Pa kombati pobresa na nos isla, nos mester inverti den nos desaroyo ekonomiko. Un bon infrastruktura ta di importansha esenshal. Boneiru no por hasi esaki riba propio forsa, nos mester pa esaki sosten di Den Haag, manera a priminti na 2010. Gobiernu lo tene su mes na e palabrashonnan i no ta
spera otro di Den Haag. Nos ta duna gabinete espasio e dianan benidero pa rekonsidera su punto di bista."