KLIENTENAN DI TERA KORA POR AKUDI DJALUNA I DJAMARS NA JEUGDHUIS JON..
Pa loke ta trata konsultanan pa kompensashon pa artikulonan eskolar
Kralendijk - Resientemente ta tumando konsultanan pa kompensashon pa artikulonan eskolar pa ana 2015-2016.
Esaki ya a tuma luga den mayoria barionan aki na Boneiru. Djaluna 15 i djamars 16 di yueni e siguiente konsulta ta tuma luga na Jeugdhuis Jong Bonaire. E konsulta di djaluna i djamars benidero ta tambe pa habitantenan di Tera Kora.
Pa por bini na remarke pa e kompensashon aki, e entrada domestiko mester ta mil sinkushen doler of mas abou. Konsultanan ta tuma luga di 9or di mainta pa 4or di atardi.
E kliente mester presenta ku sedula, slep di salario di e ultimo 3 lunanan, prueba ku e yu(nan) ta inskribi na skol of ta bai kuminsa na e skol di eskoho, karta ofisial ku ta indika e adres di e mayor(nan) por ehempel slep di salario, karta di banko, seguro, gobiernu, servisio di impuesto, tur
loke por indika e gastunan, slep di kuenta di banko di e ultimo 3 lunanan, buki di matrimonio/buki di famia, entrada di alimentashon, dekreto legal ku ta indika ku e (yu)nan ta asigna na esun ku ta hasi e petishon.
Apesar ku e kantidat di klientenan ku a akudi na e konsultanan ta relativamente abou, tog ta di spera ku mas I mas suidadano lo hasi uso di e oportunidat di hana kompensashon pa artikulonan eskolar pa loke ta trata ana 2015-2016.
Kontrali na e ana anterior, e biaha aki no a parti karta di invitashon pa esnan ku lo por bini na remarke.
Si akaso tin suidadano di otro barionan ku no a akudi na e konsulta den nan bario, nan tambe ta bon bini na e konsultanan di djaluna i djamars proksimo