PRIMISIA DI PELIKULA ANALFABETISMO RIBA DOS STUDIANTE DI FORMA
Gezagheber Edison Rijna a representa diputado Benito Dirksz enkarga ku ensenansa na e presentashon di un pelikula ku a traha riba dos studiante di FORMA ku ta partisipa na e programami pa sina lesa i skirbi i ku ta bayendo den un bon direkshon.
Na e okashon aki gezagheber Rijna a lesa e diskurso di diputado Benito Dirksz pa invitadonan den sala na Habitat.
Mas o menos kuarenta ana pasa Nashonnan Uni a dekreta e dia Internashonal di alfabetisashon. Na Boneiru tambe nos ta pone atenshon na e dia aki. Ta asina ku mester para un ratu ketu na e echo ku alfabetisashon ta un derecho sagrado i humano ku esaki ta krea e base pa ensenansa i edukashon.
Na e okashon aki konhuntamente nos ta bai mira e dokumentario ku FORMA a traha pa ilustra kiko realmente analfabetismo ta, kon esei por afekta bo bida i kiko bo por hasi tambe kon tur hende por sina e habilidat di lesa i skirbi.
Analfabetismo ta eksisti tur parti di mundu, kaminda ku un parti di e poblashon no a hana hopi posibilidat pa e por sina.
E echo ku bo no por lesa i skirbi dje bon ei, tin konsekuensia ku esaki ta stroba bo di partisipa aktivamente den e proseso laboral i bida sosial.
Por ehempel den kaso ku un persona no por lesa sufisientemente bon, bo no por yuda su yu ku tareanan di skol. Tampoko ku manualnan di entre otro aparatonan elektroniko i otro manualnan. Bo no por lesa esakinan pa instala, programa e aparatonan aki. Asina nos por menshona hopi problemanan ku bo
por konfronta siendo analfabetiko.
Nos no a bini pa papia riba e konsekuenshanan ku esaki tin riba nos so, pero mi tei pa felisita boso ku e trabou ku boso ta hasiendo riba tereno di analfabetismo. Skirbi i lesa ta dos abilidat masha importante pa sobrebibi den e mundu moderno aki.
Na Boneiru nos sa ku FORMA ta un di e instanshanan ku ta organisa kursonan di analfabetismo ku e meta pa baha e porsentahe di analfabetismo aki na Boneiru. Nos tin ku aksentua ku alfabetisashon ta un komienso di un bida nobo i ku e ta trese oportunidatnan pa bai dilanti den bida.
Alfabetismo no ta solamente sina skirbi i lesa, pero e ta krea oportunidat pa desaroyo individual tambe.
Ku dokumentario nan pa ilustra e hende i konsientisa esaki ku e posibilidat pa supera den bida ta posibel, esaki por yuda na drecha e perspektiva di bida di kada un i por refleha den komunidat. Ku esaki mi ta referi pa Mas hende por partisipa den proseso laboral, mmayor nan por kontribui den
tareanan di nan yunan, krea posibilidat pa un grupo sigui sina, krea posibilidat pa buska otro trabou. E balor propio di kada unu ta bira mas grandi.
Komo diputado Benito Dirksz enkarga ku ensenansa na nomber di gobiernu di Boneiru ta felisita i gradisi Fundashon Forma pa e bon trabou ku nan ta eherse pa e komunidat boneriano, ofresiendo kursonan, ilustrashonnan den forma di dokumentario pa hasi e hende konsiente ku nunka ta lat pa sina,
semper tin speransa.