APERTURA TANKI MARAKA HERITAGE PARK
Kralendijk--Djadumingu 3 di mei gezaghebber Edison Rijna i diputadonan Clark Abraham, Benito Dirksz i Gerald Silberie a hasi akto di presensia na apertura di Tanki Maraka Heritage Park kaminda den e temporada di Segunda Gera Mundial tabatin un kampamentu merikano Tras di Montana.
Na e okashon aki gezagheber Edison Rijna i diputado enkarga ku kultura sr. Benito Dirksz a hiba palabra i a mustra riba e importansia ku e parke aki tin pa historia di Boneiru i tambe pa eduka nos hobennan pa asina nan ta na altura i sa kiko a pasa durante di e segundo gera mundial ku binida
di e kampamentu aki Tras di Montana na Tanki Maraka.
E organisashon di BONAI dirigi pa dr. Jay Haviser a hasi diferente estudio arkeologiko riba e tereno kaminda e kampamentu tabata, pa asina hana informashon balioso di entre otro artefaktonan di sumo importante pa historia di e parke. Den e parke tin 36 borchi ku informashon di historia di e
Segundo Gera Mundial di Aruba, Korsou, Boneiru i di e kampamentu merikano Tras di Montana.
E balor agrega na e parke aki ta ku e ta bai sirbi nos turismo tambe kaminda turistanan por bishita spesial turistanan merikano lo ta interesa di e parke aki segun dr. Haviser a trese dilanti den su diskurso.
Despues di e respektivo diskursonan, gezaghebber Rijna i e tres diputadonan Abraham, Dirksz i Silberie huntu ku algun hoben di BONAI a efektua e apertura ofisial di e parke ku ta karga e nomber di "Tanki Maraka Hiretage Park".
Despues e mandatarionan i publiko presente a hasi un paseo den a parke kaminda dr. Jay Haviser arkeologo a duna splikashon di tur e 36 borchinan den e parke.
Foto ta mustra momentu gezaghebber Rijna, diputadonan i algun hoben di BONAI i arkeologo dr. Jay Haviser ta habri e porta di e parke i asina deklara e parke ofisialmente habri.