PROME KU FIN DI DESEMBER 2015 LO TUMA LUGA UN REFERENDUM
Kralendijk - Gobiernu di Boneiru a manda un karta na representantenan di "Nos ke Boneiru Bek" kaminda ta partisipa na nan ku resientemente Konseho Insular den nan reunion semanal a tuma e desishon ku pa prome ku fin di desember 2015 lo tuma luga un referendum kaminda ku e suidadano tin e
oportunidat pa duna su opinion riba e futuro struktura estatal di Boneiru.
Ku e desishon aki ta kumpli ku e deseo i petishon di e grupo di manifestantenan pa organisa un referendum, esaki ta duna motibu pa pone un punto final na e manifestashon ku a inisia na november 2014 enfrente di ofisina prinsipal di Gobiernu.
Den un kombersashon ku Gezagheber di Boneiru e representante(nan) di e grupo di manifestante a duna di konose ku dentro di poko nan lo finalisa ku nan manifestashon. A priminti ku den un termino korto konhuntamente lo deshasi di tur e atributonan ku a ser usa pa esaki.
Gezagheber di Boneiru a stipula un fecha ku pa mas tarda 18 di yueni 2015 lo mester kita tur, stul, mesa, banki, bandera, borchi (ku tekstonan skirbi) ku ta kologa na e kura di e edifisionan prinsipal di Gobiernu. Esaki ta konta tambe pa e karavan ku a ser pone riba e tereno di parkeer outo
enfrente di e edifisio di Kolegio Ehekutivo.